تجربتي مع تطبيق كامبلي (Cambly) + اقتراحات أخرى لتعلم أو تحسين اللغة الإنجليزية ..

Photo By Pixabay On pexels
بشكل عام كانت تجربة ممتعة ومفيدة لي على الصعيد الشخصي والتعليمي. وإليكم  التفاصيل :

تفاصيل الاشتراك :
- اشتركت معهم مرة وحدة ولمدة شهر في نهاية 2017  ..
- بخطة 15 دقيقة  يوميا  ( 7 أيام )، بكلاسات خاصة - فردية - .. 

تجربتي :
بصراحة لما سجلت ما كان عندي هدف محدد غير إني بأشوف مستواي وإلى مدى ممكن أوصل؛ وهالحركة كانت لها إيجابيتها وسلبيتها وكلها استوعبتها أثناء اشتراكي في البرنامج وبعده ..
فالإيجابية: عرفت نقاط القوة والضعف عندي سواء في اللغة أو حتى في الشخصية، وبالتالي عرفت الأمور اللي تحتاج تطوير وتركيز ..
والسلبية: مسألة إنه كان بشكل يومي ما كان مناسب لي أبدا فكانت تضيع علي بعض الأيام بدون محادثة، ومسألة إنه اشتراك بدون هدف ضيعني كثير وما كانت أعرف عن ايش أتكلم !
أغلبية المعلمين راح يسأل عن الشي اللي حابة أتكلم فيه اليوم: سواء كان فيه موضوع معين " محادثة " أو أسئلة معينة في اللغة زي قواعد أو الايتلس ... وبعضهم متحمسين فراح يبدون يسولفون معك كتعارف وتصير المكالمة عبارة عن محادثة ..
لما فهمت الجو العام، صرت أجهز موضوع قبل أي مكالمة وأحيانا تتغير الخطة حسب طبيعة المعلم وحماسه، المحادثة راح يتم تسجيلها وراح تنزل على طول على حسابك بعد ما تنتهي منها، وتقدري ترجعي لها بعدين : تسمعي وتقيمي نفسك أو تسترجعي بعض الشروحات والمصادر لو وُجدت ..
الحلو في الموضوع إني أقدر اختار المعلمـ/ـة بنفسي بعد ما أقرأ ملفه الشخصي. بعضهم يتفق معك من البداية على الطريقة اللي تناسبك وتفضلي يمشي فيها معك ، يعني هل تفضلي يصحح لك نطقك على طول؟ ولا حابة يسجلها لك على جنب وفي آخر المكالمة يقولها ؟ ، وبعضهم يسألك لو كنت تفضلين يصحهها كتابة ونطقًا أو يكتفي بالنطق ، وممكن أنت تبادري بهذا الطلب إذا ما تكلم .. يقدر المعلم يرسلك روابط لمراجع أو مقاطع تساعدك في موضوع معين وممكن أنت تطلبي هذا منه أيضا ..
في ذيك الفترة: ما شفت معلمين عرب، الكل تقريبا لغتهم الأم اللغة الانجليزية، ولكن قرأت في تجارب لآخرين إن فيه معلمين عرب موجودين..
نصيحتي لكم  اختاروا معلمين ما يتكلمون عربي نهائيا؛ لأنك بتصير متأكد إنهم ما راح يفهموا إلا انجليزي فتضطر تتكلم وتفكر فيها مهما كان مستواك - وهذه وجهة نظري- .
مؤخرا اكتشفت إن ممكن تتعلم لغة ثانية أو تمارسها في كامبلي : فقط ابحث في خانة البحث عن اللغة اللي حابة تتعلمها وبتلقى مجموعة معلمين أرسلهم وأسألهم إذا ممكن تمارس أو تتعلم هاللغة معهم وأبدأ المشوار الجديد.. 
أفضل المعلمين اللي جربتهم خلال ذيك الفترة :
لطيفة جدا ، تشرح وتعطي من قلب وأكثر وحدة كلمتها
لطيفة وصبورة وتعاملها وكلماتها سهل فهمها
لطيف جدا ومتفهم ، طريقة تعامله وأسلوبه ممتاز
على إنها جديدة لكنها عملية ومرتبة ، وأهم شي التعامل معها مريح وممتع
لطيفة وصبورة وفادتني كثير في تصحيح النطق
جربته كمحادثة ومن محادثته عرفت النقاط اللي مفروض أعرفها وأركز عليها
لطيف جدا جدا وصبور ومتفهم ، أسلوبه مريح ومحفز
التجربة الأولى لي والوحيدة مع اللهجة البريطانية ، لطيف ومتفهم
لطيف ومتفهم ، استفدت كثير من نصائحه في اللغة وتطويرها بشكل عام
سؤال وجواب :
-        كيف اختار الاشتراك اللي يناسبني ؟!
فيه ثلاث اقتراحات اختاروا منها اللي يناسبكم :
1-     حدد الهدف ، وعليه حدد الاشتراك : مثلا : هدفي محادثة وممارسة لغة .. فممكن يكون اشتراك يومي أو 5 أيام  لمدة ربع أو نصف ساعة - وفي اعتبارك مستواك في اللغة وقدرتك المادية -.
2-    تدخل كتجربة عشوائية وتستكشف الجو العام بنفسك، وهنا اقترح : تجرب مثلا 3 أيام أسبوعيا خلال شهر  لمدة ربع ساعة - وفي ميزان اعتبارك قدرتك المادية-.
3-    تسجل عادي في البرنامج وراح يكون فيه دقائق مجانية للتجربة 5 أو 10 دقائق ( ما أذكر ) + استخدم أكواد الدقائق المجانية وراح تنضاف لك 10 مجانية، وبكذا صار معك تقريبا 10 - 15 دقيقة جرب فيها بنفسك واحكم .. وهذا كود لعشر دقائق مجانية في حال حبيتوا تجربون : nada661 .
-        وش أحتاج عشان استخدم كامبلي ؟!
 4 أشياء أساسية: مكان هادي، نت، جهاز، سماعة .. وممكن تحضر ورقة وقلم  هنا في نقطة بأوضحها لأني كنت متخوفة منها وهي الكاميرا : لك الحرية المطلقة في تغطيتها أو تركها، والحمدلله الكل متفهم .
-        لو اخترت 5 أو 3 أيام .. كيف استعملهم ؟
الأيام تقدر تستخدمهم ورا بعض وتقدر يوم ويوم ما في قيود في ذلك .. يعني أقدر استخدم الاسبوع الاول : من الأحد إلى الثلاثاء ، والأسبوع الثاني : اختار الخميس ، السبت ، الأثنين .. أهم شي 3 أيام في الأسبوع أما الوقت: فكان اختياري متى ما فضيت أو حصلت المعلم/ة اللي أنا مرتبة معهم ( البعض تقدر تحجز معه والبعض كان يرفض الحجز) .. أهم شي تتأكد من خدمة العملاء من مسألة بداية الأسبوع واليوم في البرنامج نفسه وهل تقدر تعدله حسب بلدك أنت أو لا حتى ما تروح عليك أيامك ودقائقك اليومية ..
بالنسبة لي في ذيك الفترة كان الأثنين هو بداية الأسبوع والدقائق تتجدد يوميا الساعة 3 فجرا ( أو يبدأ اليوم الجديد )، فكنت أشيل وأراعي كثير مسألة التوقيت..
-        هل يصلح للمبتدئين ؟
أحب أوضح إنه فيه نوعين من المبتدئين اللي عندهم خلفية واللي م عندهم خلفية نهائيا .. الفئة الأولى استفادتها بتكون أكثر من الثانية بحكم الخبرة ، وما أعتقد إنه ينفع للثانية إلا لو كانوا المعلمين عرب في البداية أو يكون كلاس جماعي وليس فردي أو عندك خطة معينة ..
الأهم اشتغلوا على لغتكم  واعطوا أنفسكم مساحة واسعة للخطأ؛ لأن لولا الخطأ ما عرفنا الصح، تكلموا حتى لو كان نطق أو استخدام الكلمة خطأ، استغلوا اشتراككم واكسروا حاجز الخجل والخوف من الخطأ وتذكروا إنها لغة ثانية .. 

نصايح عامة ، خذوا واقتبسوا منها اللي يعجبكم ويناسبكم :
-       حلو يكون لك ترتيب معين ؛ بحيث تخصص كل يوم أو كل أسبوع جانب معين تركز عليه من الجوانب التالية : القراءة، الكتابة ، المحادثة ، الاستماع ، درس جديد سواء في القواعد أو الايتلس أو التوفل ، أو حتى هدفك اللي اشتركت علشانه ..
-       كامبلي وغيره من البرامج هي عبارة عن أدوات مساعدة فقط ، يعني هي مو كل شي الجزء الكبير من العمل والجهد عليك في كل حال، وكثير ناس في أصقاع الأرض ما تتوفر لهم الفرصة للاشتراك أو تجربة كامبلي أو البرامج المماثلة لأسباب كثيرة  ولذلك أرجع أقولهم إنه مجرد أداة ووسيلة في غيرها كثيير ، مثل قنوات اليويتوب ، حسابات التويتر والانستقرام :
قنوات اليوتيوب :
·       من قنوات اليوتيوب المقترحة للمستويات المتقدمة :
أولا : Eng Vid
وتحتها معلمين رائعين جد  ، بدروس مختلفة سواء في قواعد اللغة ، المفردات ، الجمل والتعابير الدارجة ... أحب أتابع لـ:
ثانيا : EnglishAnyone
·       قنوات اليوتيوب المقترحة للمستويات المبتدئة :
أولا : مع أبو عمر EnglishPlace
ثانيا : دروس أونلاين
ثالثا : Omar Abdelrahim
·       قنوات تعليمية :
أولا : AdamAcademy
ثانيا : Let's Practice English
·       قنوات مفيدة باللغة الانجليزية :
أولا : TEDx Talks
ثانيا : Brendon.com
حسابات التويتر المقترحة :
حسابات الانستقرام  المقترحة :


-       من الحسابات أو الأشخاص اللي استفدت ولا زلت أستفيد من طرحه في اللغة والاختبار ، واللي بيفيدك وتستطيع الاكتفاء به إذا كنت شخص يتشتت من كثرة المصادر هو الأستاذ الفاضل عبد الرحمن حجازي ( دليلك للايلتس ) : تويتر ، انستقرام ، والكنز العظيم قناته على اليوتيوب ..

-       أذكر وحدة من البنات كانت تقول وقتي ضيق من الجامعة ، ومن الأشياء اللي تسويها ( أعتقد يوميا ) تسجل أحداث يومها صوتيا بالانجليزي وهالحركة زادت طلاقتها في الكلام .. وأذكر بدايتي مع الانجليزي بعد الثانوي كان كتاب تحدث الانجليزي بدون معلم ، جدا جدا جميل..
-       فأنجزوا بأي طريقة حتى لو بسيطة ؛ لأن الفكرة في إنجاز ونجاح أي تعلم أو مهارة هو الاستمرار حتى لو كان بكميات قليلة.. واعرفوا إن التعليم واكتساب المهارات ما له عمر معين ولا وقت معين.. متى ما حبيت شي وامتلئت روحك بالشغف اسقيها بالتطبيق وممارسة هالشغف على أرض الواقع ..
هذا تقريبا كل شي حتى الآن ، أتمنى أعطيت فكرة عامة ومفيدة لكم ..إذا في أي سؤال أو استفسار عندكم وعندي علم بأكون سعيدة أرد عليه ..
انتهى
هنا روابط لمقاطع فيديو ملهمة قبل وأثناء تعلم أي لغة ( متجددة ) :


تعليقات

  1. الله يرضى عليك.. ملخص جميل جدا

    ردحذف
    الردود
    1. اللهم آمين أجمعين ، كل التوفيق أ. محمد ⚘

      حذف
  2. سلام عليكم اريد اشترك متردده انا افتهم انكليزي لكن ولا مره مارست المحادثه عامل للخجل الأخطاء اذا تكلمت كيف تنصحيني لان احتاجه بسبب الايلتس اريد اقوي المحادثه لديه

    ردحذف
    الردود
    1. أهلًا وسهلًا ، وعليكم السلام والرحمة () ..

      أقدر أتفهم مشكلتك ( لأن أحيانا تجيني إذا من زمان ما مارستها ) ، بس دامك حددتِ هدفك وهو الأيلتس فأنا أنصحك بقوة بحساب أ
      . عبدالرحمن حجازي ..
      تحت حسابات الانستقرام اللي ذكرتها فوق على طول بتلقين حساباته ، وقناته ع اليوتيوب .. وأهم شي التطبيق بينك وبين نفسك ..

      من النقاط اللي ذكرها : تكلمي 5 دقايق مع نفسك بالإنجليزي ، حتى لو خطأ ! .. عادي كملي .. أهم شي ينطلق لسانك وتنكسر جزء من المشكلة اللي عندك ..

      الله يوفقك ويفتح عليك ويطلق لسانك () ، بشريني بنتيجتك () ..

      حذف
  3. السلام عليكم ببالي فكرت الاشتراك من فتره بس كنت متردده اشترك وبالنهاية م استفيد او اتلخبط ف عندي الفهم مرا عالي وممارسة المحادثه عندي مو سيئة مرا لاكن دايم الأخطاء تحطمني ف بلاحظ انو فيه نتيجه اذا اشتركت وهل يعني هم صبورين على ناس مثلي؟

    ردحذف
    الردود
    1. أهلا وعليكم السلام والرحمة ❤ ..

      شوفي هو بالبداية كوني لطيفة مع نفسك قبل لا تبدين في أي شي ، يعني في الانقلش مثلا وكللغة ثانية أنتِ لازم تكوني فخورة بنفسك إنك وصلت مرحلة رائعة فيها !!
      تفهمين المسموع وتتكلمين بشكل لا بأس ( ومن كلامك فإن اللي موقفك حاليا هو مشكلة نفسية مو تعليمية ) ..

      أدري إنك ممكن تقولين إن الكلام أسهل ، لكن صدقيني إني حاسة فييك والله .. أنا قبل كنت م اتكلم خلقه مع إني اعرف ، لكن أتوتر 😅 .. ويوم خف التوتر انقطعت ممارستي اللي كانت صاغطتني ( الجامعة ) .. والآن رجع مستواي لأني من زمان ما مارست اللغة ..

      لما كنت أتكلم بكامبلي ، كنت أجاهد نفسي في أحيان كثيرة إني اتكلم حتى لو بس يطلع صوتي ، ولعلك تعرفين المشاعر الشينة اللي تجيك اللحظة .. بس اللي كان يخفف علي إني أتعلم وحاطة ببالي إنها لغة ثانية وكيف ما كان مستواي فأنا جيدة جدا إني فكرت في تعلم لغة غير لغتي الأم والمعلمين هناك ( بكامبلي ) أغلبهم لطييفين جدا جدا .. أنتِ جربي الدقايق المجانية وشوفي كيف الوضع معاك ❤ ..

      نقطة ثانية بأوضحها لك : أنا الحمدلله مستواي كان جيد الحمدلله ، ومشكلتي في الطلاقة ( ما أقصد الطلاقة المحترفة ، عقدة اللسان أكثر شي ) ..

      قناة آدم أكاديمي ( موجودة فوق ) أو اي قناة تعلمك اللغة من خلال جمل من مقاطع متفرقة تعيد الكلمة لك ٣ مرات .. كنت أقرأها وأنطقها وأنا أتابع الفيديو .. هالنقطة عطتني إنطلاقة قوية 👌🏻 ..

      شي أخير حابة أشاركك إياه ، هو هالتغريدة :
      https://twitter.com/Dr_Alwaleedi/status/1312443833662140417?s=08

      اعتذر جدا عن الاطالة ، وكل التووفيق يا رب ❤

      حذف
  4. كل الشكر والتقدير لك على مجهودك فالكتابه والتفاصيل المفيده .. مررت مرور الكرام ولكن شدني التعبير وأناقة الاسلوب
    ولم اجد نفسي الا في نهاية المقال
    فشكرا مرة اخرى على كل المعلومات وسلمت الانامل

    ردحذف
  5. العفو هذا فعلًا ما أتمناه، سعيدة جدًا وممتنة لجميل كلماتك ..

    ردحذف
  6. مرحبا
    كم سعر الكورس؟

    ردحذف
    الردود
    1. اهلًا ..

      ما أتذكر والله كم كان، الآن أعتقد اختلفت الأمور.. هنا رابط الأسعار حسب الباقة المختارة:

      https://www.cambly.com/en/subscribe?lang=ar

      بالتوفيق يا رب 🤍

      حذف
  7. شكرا لك على مجهودك ❤️❤️

    ردحذف
  8. هل المدرس خلال اشتراكك الشهري واحد و ممكن تغيره

    ردحذف
    الردود
    1. يمكنك تغيريه، ولا يشترط الالتزام بمدرس معين خلال فترة اشتراكك

      حذف

إرسال تعليق