خلاصة سنة الامتياز - علم نفس اكلينكي : جامعة الأميرة نورة بنت عبد الرحمن 3> ..

تجربتي في عيادة الأسنان بجامعة رياض العلم () ..

Photo by Pixabay on Pexels

السلام عليكم والرحمة، وأهلاً بكم من جديد ..

هذي التدوينة طويلة نوعًا ما، فخذوا كامل احتياطاتكم قبل البدء =)

يمكن الشي اللي بأكتبه اليوم ما يهم الأغلبية ، ولكن شخصيًا كنت أتمنى ألقى مثلها مذكور أثناء بحثي عن الموضوع .. ولكني وعلى كل حال ممتنة لربي جدًا على تيسيره ولطفه بي أثناء هذه التجربة ، وأتمنى إن ذكرها يكون مفيد لأحدهم يومًا ما () ..

بس قبل لا أبدأ أحب أقولكم إني أعشق استخدام الإيموجي في الكتابة ، والأمر هنا صعب كثير ومسوي لي أزمة لأني ما أقدر استخدمها =(  – مدري هل لأني جديدة على عالم التدوين وما أعرف وينها أو لأن الموضوع غير متاح أصلاً ><! ، جالسة استكشف الأمر -.

المهم تجربتي عن الأسنان وما أدراك ما الأسنان =( .. عقدة الأغلبية: هي عقدة الألم، وعقدة الرعب ، وعقدة الجيب أيضًا  =| ...

مثلي مثل الأغلبية كانت عقدة الرعب والخوف هي المسيطرة عليّ من صغري، والإشكال عندي تعدى مسألة الذهاب لعيادة الأسنان ، فوصل إلى أي شي يتعلق بالأسنان أشوفه قدامي =( .. يعني مرحلة الأسنان اللبنية كانت من أكبر أزمات الطفولة عندي، وكنت أتحاشى أقول لأحد إن عندي سن يستعد للسقوط وكنت أعاني بصمت حتى يرحمني ويطيح من نفسه =) .. حتى أفلام الرعب اللي كانت تصير في البيت من عمليات خلع الأسنان أو مراسم استقبال العائد من زيارة عيادة الأسنان ... كل هذي الأمور سببت في كبر هالعقدة غير كلام أطباء الأسنان أنفسهم لما أضطر أروح لهم - وكأني خروف يجر إلى المسلخ - ، والغدرات اللي تصير هناك >< .. ( حرفيا رحمتني وأنا أتذكر وأكتب هالكلام ) ..

المهم كبرت ومع الوقت بديت أدرك أن مشكلتي – مستوى الخوف والتوتر -  يزيد لما يكون فيه أحد معي، ثم استوعبت نقطة أخرى وهي : طبيعة المستوصفات والأطباء اللي كنا نروح لهم !

لذا بديت أبحث عن عيادات معقولة الأسعار وأطباء أصحاب خبرة وأمانة والرحلة كانت حرفيًا طويلة ( أكثر من 5 سنوات وأنا أبحث وأجرب )، بالإضافة إني قررت أروح لأي موعد لحالي.. 
فكنت أول شي أبدأ بتنظيف الأسنان عند أي تجربة جديدة وهو معياري الأولي في التقييم : كنت أشوف النظافة ، الدقة وجودة العمل ، والسعر أكيد ... يمكن تستغربون إن هذي كلها ممكن تآخذون عنها فكرة من أول زيارة أو أول موعد، لذلك راح أشرح لكم بالتفصيل؛ النظافة مثلًا : وحدة من العيادات اللي رحتها كانت ضمن مستوصف أول ما دخلت العيادة نفسها كانت أرضيتها غير نظيفة أبدًا ومع ذلك عذرتهم وقلت يمكن جيتهم في وقت مبكر وما أمداهم لما جت تشتغل الدكتورة على الأسنان طلعت من الغرفة ورجعت وخذت أوراق ومسكت الباب بنفس القفاز اللي جالسة تشتغل فيه ولا غيرته ><! – أنا ذيك اللحظة مصدومة وكنت شاكة إني مسوسة حبتين في موضوع النظافة - .
الأمر الآخر كان الدقة وجودة العمل: كنت أشوف خفة يدها وأقيم شغلها لما أرجع البيت ، يعني مثلًا نفس الدكتورة كانت تسوي التنظيف بآلة الحفر نفسها فكسرت جزء من سن أمامي ولا استوعبت الموضوع إلا لما قريت عنه بالصدفة بالتويتر او الانستقرام، وطبيبة أخرى في مستوصف آخر كانت تسوي التنظيف لللأسنان الأمامية فقط وتقول هي الأهم عشان الابتسامة =|، أما الثالثة كانت دايم تقولي أنتِ أسنانك ممتازة ولا فيها ولا شي ! رغم إني أشوف التسوس =)!، بالإضافة إني كنت أسوي الحشوات بدون بنج – ولا كان فيه خيار أصلًا -.
أما بالنسبة للأسعار فقررت بعد تجاربي في عيادات المستوصفات - بما إنها أرخص شوي - إني أجرب العيادات المتخصصة في الأسنان حتى وإن كانت غالية  بس اخترت جودة العمل والدقة وقلت أجربها: العيادة الأولى - معروفة ولها فروع - كانت مسوية عروض وقلت بأجرب دام إن الموضوع عندي تنظيف فقط وللأسف يدها كانت مرة ثقيلة بالاضافة إلى إن العيادة بما فيها يلعبون بالأسعار! يعني العرض المطروح سعر ، والاستقبال سعر والدكتورة سعر !! وبعد أخذ وعطا طلعت بالعرض ! وما عاد رجعت لهم . العيادة الثانية – أيضا معروفة ولها فروع – وكانت طريقة الحشو والتنظيف على عمى وغير دقيقة ، أما العيادة الثالثة شغلها ممتاز ولكن يلعبون بالخدمات المكتوبة في الفاتورة : يعني مثلا سويت أشعة وعلاج العصب ولما طلعت بأحاسب كتبوا لي خدمة ما سويتها ولما استفسرت قالوا في خطأ ! واكتفوا بتعديل الخطأ بقلم ع الفاتورة ! .. وهذي أمثلة قريبة ولا المواقف لا تعد ولاتحصى ><! .. ومع ذلك أنا متأكدة إن فيه عيادات خاصة فيها أطباء على مستوى عالي من الخبرة والمهنية =) ..

آخر شي استسلمت ، وقلت بأجرب المستشفيات الجامعية واللي يكون فيها عادة طلاب تحت إشراف إستشاريين وأطباء .. وعلى الرغم من خوفي وتأثري بالقصص اللي كنت أسمعها من اللي حولي وأقرأها إلا إن تجربة وحدة من صديقاتي حمستني + كنت أشوف إن الطلاب أكثر حماس وأكثر شغف بما إنهم في بداية مشوارهم من غيرهم ( قاعدة لا تُعمم أكيد ). بالإضافة إلى إني صايرة أسأل واستفسر عن أي إجراء وعندي خلفية بسيطة عن بعض الإجراءات من حسابات بعض أطباء الأسنان على الانستقرام خاصة مثل د. محمد الصفي و د. شهاب الحقان ، ومؤخرا عرفت د.عبدالسلام محمد على اليوتيوب، كل هذا زاد حماسي لخوض هذه التجربة بأسلحتي المتواضعة ودعائي قبل كل شي =) ..

بديت أمهد لنفسي بعض الأمور، مثل : إن الفترة اللي بأعالج فيها أسناني ممكن تطول ، الجلسة أو الموعد الواحد ممكن يطول وفمي بيكون مفتوح لفترة طويلة ، وأهم شي إني حاطة احتمال إن نسبة الخطأ بتكون أعلى من نسبة الصح ، بعبارة ثانية  كنت متأكدة إن العلاج بيكون فيه أخطاء خاصة لو كانوا طلاب ، فكنت متقبلة فكرة حدوث الخطأ لو وقع بغير قصد ..

بديت بالبحث وبالتواصل مع أكثر من مستشفى ، استقريت على مستشفيات جامعة رياض العلم ()، وهذي تجربتي فيها أهم النقاط اللي ممكن تفيدكم :
-          طريقة الحجز إما من الموقع ، أو من خلال هذه التغريدة ؛ بحيث تختارون أحد الأطباء اللي حاطين كروتهم وتتواصلون معهم وهذا اللي أنا سويته – فيه خيارات لأكثر من جامعة - .
-          العلاج عندهم غير مجاني ولكن بأسعار رمزية ، وبعض الأطباء يقدمونه مجاني تحت ظروف معينة ( على حسابهم الخاص ). بالنسبة لي، أعلى شي كان 504 ريال تلبيس سن بعد علاج عصب وأقل شي كان 5 ريال وكان عبارة عن حشوة معينة، وبقية الأمور تترواح حسب الخدمة ونوعها واللي يقدمها ، سواء كان استشاري ، أخصائي ، طلاب امتياز ، أو طلاب ، الدكتورة اللي أنا معها كانت طالبة ..
-           بصراحة يفوزون بمستوى النظافة ، وهذا الشي اللي خلاني مرتاحة مهما طالت المدة ..
-          المواعيد راح تكون بينك وبين الطبيب اللي تشتغل معه، ولازم يكون فيه تأكيد منه علشان ما تروح على الفاضي .
-          الجميل في الموضوع كله : إن ما في خطوة تتم إلا بعد موافقة المشرف على الطبيب اللي ماسك حالتك + المشرف يتأكد من سير عمل كل إجراء ..
-          رحلتي معهم أخذت  تقريبا 3 شهور، بديت الجلسة الأولى بالأشعة، وفحص عام للأسنان واللثة ، ثم تنظيف الأسنان، وانتهت بشرح موجز عن الخطة المقترحة للعلاج . في البداية كانت مواعيدي أسبوعية ثم صارت مرتين في الأسبوع وأحيانًا يكون يومي كامل عندهم ( يعني موعدين في نفس اليوم ).
-          فكرة موعدين بيوم واحد كانت متعبة خاصة للفك لأن الفم بيكون مفتوح طول فترة العلاج تقريبا ، جربتها مرتين أو 3 مرات وما راح أعيدها إلا إذا كان الموضوع طارئ =) ، وعلى فكرة مواعيد الصباح أفضل من مواعيد بعد الظهر إذا كنت متفرغ ، ومواعيد بعد الظهر بتكون الأنسب لو كنت طالب أو موظف ..
-          أكثر تجربة مزعجة بالنسبة لي كانت أخذ مقاس الوتد ( اللي قبل التلبيس )؛ حدث خطأ بسيط وإصلاحه كان متعب شوي، والتلبيسة المؤقتة؛ لأنها كانت تنفك لما أرجع البيت ><! ، ولكن اللي خفف علي الموضوع إن الدكتورة كانت واضحة معي وقالت إنه فيه خطأ صار+ أعطتني حلول لما كلمتها على الواتس + وكنت مجهزة نفسي نفسيًا لحدوث الخطأ ..
-          صدقًا، خلال شغلي معهم ما حسيت إن دكتورتي طالبة ( ما شاء الله عليها ) ، الشغل نظيف ودقيق والأهم من هذا كله فيه احتواء وتفهم؛ قلت لها في البداية إن عندي تجارب سيئة نوعًا ما ، وعندي هالخوف اللي عند الأغلب =) .. كنت أسأل أسئلة كثيرة وهي كانت متفهمة وترد وتشرح بكل لطف ، حتى تعليقاتي الغير واضحة المعالم لقت لها نصيب من إنصاتها =) ..

من المعلومات اللي تصححت لي خلال هالفترة :
-          نقدر نفرش أسناننا بعد الوجبة على طول – ما يحتاج ننتظر فترة معينة –  ..
-          التسوس يبدأ باللون الأبيض وخلال هالوقت يمديك تعالجه بدون حفريات بواسطة الفلورايد ..
-          أثناء التلبيسة المؤقتة ، أسأل من إمكانية استخدام خيط الأسنان حولها لأن بعض الحالات ( مثل حالتي ) ما ينفع لها الخيط لأسباب معينة ..
-          كثرة استخدام الغسول بلا داعي صحي ، قد يغير لون الأسنان ..
-          قالب الواقي الليلي مختلف عن قالب التبيض وكلها لازم لها تفصيل خاص بك، ولي تجربة مع قالب الواقي الليلي الجاهز: اشتريت قالب من أماوزن ولبسته ليلة وحدة وفي الصباح حسيت باختلاف عضة أسناني ><! ..
-          أسوأ شي ممكن يصير في حال كانت الحشوة مرتفعة هو الصداع ..
-          بعض الناس عندهم قابلية أعلى من غيرهم للتسوس حتى في حال الالتزام بالتنظيف ولذا واجب عليهم الالتزام بالزيارات المنتظمة لتفادي أي مشاكل من البداية ..
-          أكثر مشاكل تسوس الأسنان ما تكون على سطح الأسنان العلوي، ولكن بين الأسطح الجانبية أو بين السن والآخر. وأحيانا يكون التسوس الظاهر بسيط جدًا ولكن المشكلة تكون كبيرة داخل هذا السن ، ولذا مهم جدًا علاج الأمورالصغيرة من البداية لتفادي أي إجراءات أكبر ..
-          أهمية الواقي المطاطي أثناء العمل ، مزعج شوي ولكنه مهم جدًا. اللي جرب بيفهم أهميته ..

هذا اللي يحضرني في الوقت الحالي ، ولعلي أتحدث في وقت لاحق – إن شاء الله - عن تجربتي في تخطي الخوف من أطباء وعيادات وطاري الأسنان بكبرها  =D ..

من هنا تقدرون تختارون العيادة المناسبة لكم ( إعلان جديد 1442هـ / 2020 م ) :


حتى ذلك الوقت وفي كل وقت أتمنى لكم دوام الصحة والعافية () ..


تعليقات

  1. شكرا على المعلومات. ممكن تعطينا فكرة عن أسعار رياض العلم. عندي تسوس في الأسنان و اللثة وكم ممكن تكلفني عندهم.

    ردحذف
    الردود
    1. العفو ، وأهلا سهلا :) ..
      ما أدري والله عن مشاكل اللثة لكن أغلب الشغل علي كان لتسوس الأسنان : والأسعار تختلف من رتبة الدكتور ( طالب / امتياز / أخصائي / استشاري ) ..
      بالنسبة لي كانت طالبة : وحتى الحشوات تختلف على حسب عمق التسوس ونوع الحشوة : يعني أقل وحدة كانت 5 ريال وأعلى وحدة إذا ما خاب ظني 40 ريال وهذا المستوى بين 5- 40 ريال ، تنظيف الأسنان كان 25 ريال - بدون القيمة المضافة - ، الأشعة اللي في البداية ( 3 أشعات ) كانت 78.75 ريال مع القيمة المضافة ..

      أتمنى لك دوام الصحة والعافية

      حذف
  2. السلام عليكم ورحمة الله وبركاته

    تواصلت مع الجامعه قبل شوي للاستفسار عن امكانية وجود استشاري او اخصائي لعلاج الم في احد الاسنان لدي والحاله طارئه لكن يقول لي مافيه الا طلاب امتياز حاليا

    بحكم تجربتك هل تشوفين اروح واكتفي بطالب امتياز يعالجني بدون اشراف من طبيب استشاري او مختص

    ردحذف
    الردود
    1. أهلا أ. محمد ، وعليكم السلام والرحمة ..

      سألت بعض من راح لهم هالفترة ، وكان واحد منهم يشتغل مع طالب ماستر ( دراسات عُليا ) ..
      ومدح شغله وأثنى عليه ..

      اقتراحي لك روح وشوف مشكلة هالألم يمكن حساسية أسنان أو مشكلة باللثة .. جرّب الزيارة الأولى وأسأله عن كل شي وشوف التشخيص المبدئي .. وشوف نفسك إذا ارتحت معه ولا لأ ..

      عن نفسي أنا ممكن أروح له حتى بدون إشراف ، لأني جربت مستوى طالبة قبل الامتياز ( بس هذا ما يمنع إني أجرب تنظيف الأسنان أول شي ) ..

      أعذرني طوّلت عليك ، ولكن حبيت أوضح لك بشكل دقيق ..

      أتمنى لك راحة البال والعاافية الدائمة

      حذف
  3. الاخت ندى شاكر جدا زيارتك لجامعتي جامعة رياض العلم و شاكر جدا ذكرك لي بالمدونة هذا وسام شوف لي ..
    اخوك شهاب الحقان

    ردحذف
    الردود
    1. الشرف لي والله بمرورك الكريم ، الله يسعدك ويرفع قدرك وينفع بك العالمين 💐 ..

      حذف
  4. كم سعر الخلع الجراحي

    ردحذف
    الردود
    1. ما عندي خلفية والله ، ممكن تتصل عليهم وتسأل ..

      حذف
  5. اهلا ندى شكرا لطرحك هذا الموضوع
    عندي سؤال بخصوص سعر التلبيس للسن هل تتذكرين كم كان؟ ومتى سويتيه؟

    ردحذف
    الردود
    1. العفو ريما ، إذا خاب ظني كان ٥٠٤ ريال على نهاية ٢٠١٩

      حذف
  6. للأسف الشديد علاج الأسنان في جامعة رياض العلم تغير تماما عن السابق

    ردحذف
    الردود
    1. أهلا ، اتفق معك جزيئًا مع الأسف .. تجربتي في الطوارئ عندهم ما كانت جيدة أبدًا .. راح انتظر عودة الطلاب أنفسهم ( مو الامتياز ) وأعيد التجربة وأشوف .. في النهاية طبيب الأسنان الجيد رزق؛ ومتأكدة إنهم موجودين هناك لكن ما كُتبوا لنا ..

      حذف
  7. شكرًا لك على مشاركة تجربتك حاليا أنا راح أمر بنفس التجربة لكن بجامعة الملك عبدالعزيز إن شاءالله إذا تيسرت ويارب خير كنت خايفة ومتوترة ومنحرجة كثير لكن كلامك طمني شكرًا لك🤍

    ردحذف
    الردود
    1. أهلًا أهلًا آلاء ..

      العفوو ويا رب تكون تجربتك ممتازة وتتوفقين بالدكتورة اللطيفة ❤ ..

      عارفة ليش ممكن تكوني خايفة ومتوترة 😅 (محدثتك مازلت تخاف في كل موعد 🥲) لكن م عرفت سبب الحرج ..

      دعواتي لك بأن الله يطمن قلبك ويلبسك لباس الصحة والعافية 🤍🌿

      حذف

إرسال تعليق